دەقی یاسا

یاسای ده‌سته‌ی سه‌رۆكایه‌تی هه‌رێمی كوردستانی عێراق

به‌ناوی خوای به‌خشنده‌ ومیهره‌بان
به‌ناوی گه‌له‌وه‌
ئه‌نجومه‌نی نیشتمانیی كوردستانی عێراق
ژماره‌ی بڕیار:48
مێژووی بڕیار:22/12/1993

بڕیار

به‌ پێی حوكمی بڕگه‌(1) له‌ مادده‌ (56)ی یاسای ژماره‌ (1)ی ساڵی 1992 و له‌سه‌ر داوای ژماره‌ی یاسایی ئه‌ندامانی ئه‌نجومه‌نی نیشاتمانی عێراق.
ئه‌نجومه‌نی نیشتمانی له‌ دانیشتنی ڕۆژی 20/12/1993 دا بڕیاری ده‌رچواندنی ئه‌م یاسایه‌ی دا.

یاسای ژماره‌ (19) ی ساڵی 1993
یاسای ده‌سته‌ی سه‌رۆكایه‌تی هه‌رێمی كوردستانی عێراق

مادده‌ی یه‌كه‌م:
به‌ده‌ر له‌ حوكمه‌كانی یاسای ژماره‌ (2)ی ساڵی1992 ده‌سته‌یه‌ك داده‌مه‌زرێ پێی ده‌گوترێ (ده‌سته‌ی سه‌رۆكایه‌تی هه‌رێمی كوردستانی عێراق) و یه‌م ده‌سته‌ڵات و ئه‌ركانه‌ی كه‌ له‌ یاسای ناوبراوی سه‌ره‌وه‌دا هاتوون جێ به‌جێ ده‌كات تاكو قۆناغی دووه‌می هه‌ڵبژاردنی رابه‌ری بزووتنه‌وه‌ی رزگاری خوازیی كوردی ته‌واو ده‌بێت.

مادده‌ی دووه‌م:
ده‌سته‌ی ناوبراو له‌ مادده‌ی یه‌كه‌می ئه‌م یاسایه‌ له‌و دوو پاڵێوراوانه‌ پێك دێت كه‌ زۆرترین ده‌نگی ده‌نگده‌رانیان له‌و هه‌ڵبژاردنه‌ی كه‌ به‌ پێی یاسای ژماره‌ (2)ی ساڵی 1992 له‌ڕۆژی 19/5/1992 دا كراوه‌، له‌گه‌ڵ سه‌رۆكی ئه‌نجومه‌نی نیشتمانیی كوردستانی عێراق و سه‌رۆكی ئه‌نجومه‌نی وه‌زیرانی هه‌رێمی كوردستانی عێراق و دوو ئه‌ندامی مه‌كته‌بی سیاسی هه‌ریه‌ك له‌ودوو حزبه‌ی كه‌ دوو پاڵێوراوه‌كه‌ تێی دان.

مادده‌ی سێیه‌م:
بڕیاره‌كانی ده‌سته‌ به‌ تێكڕای ده‌نگ وه‌رده‌گیرێن و به‌ ئیمزای ئه‌ودوو پاڵێوراوه‌ ده‌رده‌چن، كه‌ له‌ مادده‌ی دووه‌می ئه‌م یاسایه‌دا هاتوون و له‌ كاتێك دا كه‌ یه‌كێك له‌و دووپاڵێوراوانه‌ له‌ ده‌ره‌وه‌ی هه‌رێم بوون، ئیمزای ئه‌و ئه‌ندامانه‌ی ئاماده‌ ده‌بن به‌سه‌و ئاماده‌ نه‌بوونی كارناكاته‌ سه‌ر نیصابی كۆبوونه‌وه‌ی ده‌سته‌كه‌.


مادده‌ی چواره‌م:
له‌ كاتێكدا كه‌ هه‌ردوو پڵێوراو به‌یه‌كه‌وه‌ له‌ ده‌ره‌وه‌ی هه‌رێم بوون، بڕیاره‌كان به‌ ڕێككه‌وتنی ئه‌و ئه‌ندامانه‌ی كه‌ده‌مێننه‌وه‌ وه‌رده‌گیرێن و به‌ ئیمزای سه‌رۆكی ئه‌نجومه‌نی نیشتمانی كوردستانی عێراق و سه‌رۆكی ئه‌نجومه‌نی وه‌زیرانی هه‌رێمی كوردستان ده‌رده‌چن.

مادده‌ی پێنجه‌م:
ئه‌نجومه‌نی نیشتمانیی كوردستانی عێراق بڕیاری ئه‌مانه‌ ده‌دا:
1/ ناونانی ئه‌و پاڵێوراوانه‌ی كه‌ له‌ مادده‌ی (2)ی ئه‌م یاسایه‌ ئه‌نجام ده‌دا ئه‌مه‌ش له‌به‌ر رۆشنایی ئه‌نجامی هه‌ڵبژاردنی رۆژی 19/5/1992 ده‌بێ.
2/ناوی ئه‌و ئه‌ندامانه‌ی هه‌ردوو مه‌كته‌بی سیاسی بۆ ئه‌ندامێتی ده‌سته‌كه‌ ده‌ستنیشان ده‌كات كه‌ له‌لایه‌ن هه‌ردوو حزبه‌وه‌ پاڵێوراوان.
3/روو له‌ ئه‌ندامانی ده‌سته‌ ده‌نێت تاكو به‌ پێی ئه‌م یاسایه‌ و یاسای ژماره‌ (2)ی ساڵی 1992 بۆ ئه‌وه‌ی هه‌ریه‌كه‌یان ئه‌و كارو ئه‌ركانه‌ جێ به‌جێ بكه‌ن كه‌ پێیان سپێردراوه‌.

مادده‌ی شه‌شه‌م:
ئه‌ندامانی ده‌سته‌ به‌ر له‌ ده‌ست به‌كاربوونیان و به‌كارهێنانی ئه‌و ده‌سه‌ڵاتانه‌ی كه‌ پێیان سپێردراوه‌ سوێندی یاسایی به‌ پێی مادده‌ (9)ی یاسای ژماره‌ (2)ی ساڵی 1992 له‌به‌رده‌م ئه‌نجومه‌نی نیشتمانی كوردستانی عێراق ده‌خۆن.

مادده‌ی حه‌وته‌م:
هه‌موو بڕیار و كارێك كه‌ به‌ پێی ده‌سته‌ڵاته‌كانی كه‌ له‌ یاسای ژماره‌ (2)ی ساڵی 1992 دا هاتبێ تاكو ده‌رچوونی ئه‌م یاسایه‌ شه‌رعین و جێ به‌جێ ده‌كرێن.

ماددی هه‌شته‌م:
هه‌ر ده‌قێكی دیكه‌ له‌گه‌ڵ ئه‌م یاسایه‌ نه‌گونجێ كاری پێ ناكرێ.

مادده‌ی نۆیه‌م:
ئه‌م یاسایه‌ له‌ رۆژی بڵاوكردنه‌وه‌ی له‌ رۆژنامه‌ی ره‌سمی دا كاری پێ ده‌كرێ.


                                                

                                                                                                                 جوهر نامق سالم
                                                                                               سه‌رۆكی ئه‌نجومه‌نی نیشتمانیی كوردستانی عێراق