بەناوی خوای بەخشندە و میهرەبان
هەرێمی كوردستان - عێراق
سەرۆكایەتی هەرێم
سەرۆك
بەناوی گەلەوە
بـڕیـاری ژمارە (9)ی ساڵی 2014
بە پێی ئەو دەسەڵاتەی لە بڕگەی (1) ی ماددەی (10) ی یاسای سەرۆكایەتی هەرێمی كوردستان – عێراق ی ژمارە (1) ی ساڵی 2005 ی هەمواركراو پێمان دراوە، بریارماندا بە دەركردنی بریاری ژمارە (19) ساڵی 2014 كە پەرلەمانی كوردستان-عێراق لە دانیشتنی ژمارە (18) لە 23/7/2014 پەسەندی كردوە :
بڕیاری ژمارە (19)ی ساڵی 2014
تایبەت بەهێزەكانی پێشمەرگە
یەكەم: وەزارەتی پێشمەرگە بۆ وەرگرتنی مووچەی مانگانە یەكەم وەزارەت دەبێت.
دووەم: پێویستە دەرماڵەی مەترسی تایبەت (الخگورە الخاصە) بۆ هێزی پێشمەرگە سەرف بكرێت.
سێیەم: مووچەی وەزارەتی پێشمەرگە هاوتای مووچەی هێزەكانی ناوخۆ و ئاسایشی هەرێمی كوردستان دەكرێت.
چوارەم: پێویستە هەموو هێزەكانی پێشمەرگە لە ماوەی شەش مانگ لە دەرچوونی ئەم بڕیارەوە لە چوارچێوەی وەزارەتی پێشمەرگەدا وەك هێزێكی نیشتیمانی یەك بخرێت، بەتایبەتی یەكەكانی (70و80 ) .
پێنجەم: پێویستە پێداچوونەوە بكرێت بە بەرزكردنەوە و بەرزبوونەوەی پلە(ترقیە) سەربازییەكانی پێشمەرگە.
شەشەم: پێویستە نەسرییەی یەكەكانی هێزی پێشمەرگە یەك بخرێت.
حەوتەم: پێویستە مووچەخۆری بێ دەوام لە هێزەكانی پێشمەرگە نەهێڵرێت.
هەشتەم: پێویستە كاتی دەوام و پشووی هێزی پێشمەرگە یەك بخرێت.
نۆیەم: پێویستە هێزە ئەمنیەكان لە ناوچە كوردستانییەكان یەك بخرێن.
دەیەم: پێویستە هەموو ئەو چەك و تەقەمەنی و پێداویستیی وئامێرە سەربازییانەی لە پاش رووداوەكانی گرتنی موسڵ كەوتوونەتە دەست هێزە جیاجیاكانی هەرێمی كوردستان بگەڕێنرێنەوە بۆ وەزارەتی پێشمەرگە.
یازدەیەم: پێویستە سووتەمەنی و پێداویستی تەندروستی بەشێوەیەكی باشتر بۆ هێزی پێشمەرگە دابین بكرێن.
دوازدەیەم: دابینكردنی خواردنی تەندروست و گەیاندنی بەهێزی پێشمەرگە لەكاتی خۆیدا.
سێزدەیەم: دابینكردنی چەك و تەقەمەنی پێویست بۆ هێزی پێشمەرگە.
چواردەیەم: ئەو پێشمەرگانەی كە شەهید دەبن دەبێت لە ڕێوڕەسمێكی شایستەدا بەخاك بسپێردرێن و هاوكارییەكی ماددی خانەوادەكانیشیان بكرێت.
پازدەهەم: پێویستە حكومەتی هەرێم ئەركی چارەسەری بریندارەكان لە ئەستۆ بگرێت، لە كاتی برینداربونیانەوە تا چارەسەركردنیان و، هاوكاری مادیش بكرێن.
شازدەهەم: پێویستە هێزی پێشمەرگە لەو جێیانە نەكشێتەوە كە لەدوای 9/6/2014 تێدا جێگیر بوون.
حەڤدەهەم: حكومەت لەكاتی كۆتایی هاتنی قەیرانی دارایی هەرێم، دەبێت هەموو ئەو بڕگانەی ئەم بڕیارە كە لە ئێستادا ناتوانرێت جێبەجێ بكرێن، جێبەجێیان بكات.
هەژدەهەم: پێویستە ئەنجومەنی وەزیران پێڕەو و رێنمایی پێویست بۆ ئاسان جێبەجێكردنی ئەم بڕیارە دەربكات.
نۆزدەیەم: كار بەهێچ دەقێكی یاسایی یان بڕیارێكی ناكۆك لەگەل حوكمەكانی ئەم بڕیارە ناكرێت.
بیستەهەم: لەسەر ئەنجومەنی وەزیران و لایەنە پەوەندیدارەكان پێویستە حوكمەكانی ئەم بڕیارە جێبەجێ بكەن.
بیست و یەك: ئەم بڕیارە لە ڕۆژی دەرچوونیەوە كاری پێدەكرێت و لە رۆژنامەی فەرمی ( وەقایعی كوردستان )دا بڵاودەكرێتەوە.
د.یوسف محمد صادق
سەرۆکی پەرلەمانی کوردستان - عێراق
هۆیەكانی دەرچوواندن
لە پێناو باشتر كردنی ژیان و گوزەرانی هێزی پێشمەرگە و، رێكخستنی كاروبارەكانیان و، دابین كردنی پێداویستیەكانیان، ئەم بڕیارە دەرچوێندرا.
